എങ്ങനെ നീയെന്റെയുള്ളം കവർന്നു
കാർമുകിൽവർണ്ണാ, ഉണ്ണിക്കണ്ണാ?..
കാണാതിരുന്നാലുമെന്നുള്ളിൽ കള്ള-
ക്കണ്ണനായാടിതിമിർക്കും - എന്റെ
കണ്ണിന്റെ പുണ്യമായ്ത്തീരും!
(എങ്ങനെ )
കണ്ടാലും കണ്ടാലും മതിവരുന്നില്ലല്ലോ
കൽമഷം തീർക്കുമെൻ കണ്ണാ..
നിന്നെ ഞാനെങ്ങനെ വർണ്ണിച്ചിടേണം
കായാമ്പൂവർണ്ണാ.... പൊന്നുണ്ണിക്കണ്ണാ!
(എങ്ങനെ )
കുട്ടിക്കുറുമ്പുമായ് നീയെൻ മടിത്തട്ടിൽ
നർത്തനമാടിക്കൊണ്ടുമ്മ നല്കേ,
എല്ലാം മറന്നു ഞാൻ നിന്നിലലിയുമ്പോൾ
എന്നിൽ നീ മാത്രമാണുണ്ണികൃഷ്ണാ..
(എങ്ങനെ )
കാറ്റുപോലെന്നെ തഴുകിയുണർത്തുന്നു
കാതിൽ മുഴങ്ങുന്നൊരീണമായ്നീ
പ്രേമോദാരനായ് മനസ്സിൽ നിറയുന്നു
രാധാസമേതനായ് ആടിടുന്നു
(എങ്ങനെ )
