ചിന്തകളുടെ ചിലന്തി വലകൾ

ചിലന്തിവല പോലെ ഒട്ടിപ്പിടിച്ച ചില ചിന്തകൾ
തുരുമ്പിച്ച ഓർമ്മകൾക്കു മുകളിൽ കുട പിടിക്കുന്നു..
പരസ്പരം പഴിചാരുന്ന മനസ്സുകളിൽ
പരാജയത്തിന്റെ കരുവാളിപ്പ്.....

അലഞ്ഞവരുടെ യാത്രകളിലെ
അപരിചിത കാഴ്ചക്കാരായി തലങ്ങും വിലങ്ങും ഓടുമ്പോൾ,
പൊടിപടലങ്ങൾക്കിടയിലെ അവ്യക്തയാകുന്നു
ഓരോ ബന്ധങ്ങളും... !

തമ്മിൽ ചേർന്നിരുന്നു പറഞ്ഞ തമാശകളൊക്കെയും,
ഒരൊറ്റ വാക്കിൽ കിടന്നു പിടഞ്ഞു ചാകുന്നു!

മരവിച്ച ഹൃദയത്തിൽ പിണക്കത്തിന്റെ
താക്കോലീട്ടു പൂട്ടി വലിച്ചെറിയും വരെ മാത്രം ആയുസ്സുള്ള ബന്ധങ്ങളെ,
ബന്ധനത്തിലാക്കി ഒന്നുമറിയാത്ത പോലെ
നടന്നു നീങ്ങുമ്പോൾ,
പുതിയൊരു വല കെട്ടുന്ന തിരക്കിലാവും
ചിലന്തി വീണ്ടും.......!