ചിന്തകൾ ചിന്തേരതിട്ടു മുന്നേറണം
കലികാലമാണിതെന്നോർക്കണമെപ്പൊഴും.
നന്മയും തിന്മയും വേർതിരിച്ചറിയണം
സങ്കടച്ചുഴികളിൽ വീഴാതിരിക്കണം.
കപടമുഖങ്ങളാലിന്നേറെ വൈകൃതം,
കദനങ്ങൾ കുമിയുമീലോകത്തിലെവിടെയും
കരുതിയിരിക്കണം, മുന്നേറണം നമ്മൾ
തളരാതിരിക്കണം, ധീരരായ്ത്തീരണം!
കാലവും കോലവും മാറിയേക്കാം, വിഷ-
പ്പുകയേറ്റു ധരയും കറുത്തുപോകാം.
ജാതിമതവർഗ്ഗവിദ്വേഷങ്ങളിൽ, പിന്നെ
രാഷ്ട്രീയപ്പോരിലും ലോകം ചുവന്നിടാം.
ശാസ്ത്രം കുതിച്ചിട്ടും തളരുന്നു മാനവർ
ആധികൾ, വ്യാധികൾ പടരുന്നിതെവിടെയും
കലികാലദോഷങ്ങൾ മാറുവാനായി നാം
സത്കർമ്മമെപ്പൊഴും ചെയ്തു ജീവിച്ചിടാം.
No comments:
Post a Comment