അപവാദച്ചൂടില് ചുട്ടെടുത്ത
ഹൃദയത്തെ
പരദൂഷണ ദാഹവുമായി
അലഞ്ഞവര്...
നാല്ക്കവലയിലെ അറവുശാലയില്
കെട്ടിത്തൂക്കി വില്ക്കുമ്പോള്
മണം പിടിച്ചു നടക്കുന്ന
ചെന്നായ് കൂട്ടവും
മുഖം മൂടിയണിഞ്ഞ
സദാചാരചിന്തകരും ...
എരിവും പുളിയും ചേര്ത്ത
മസാലക്കൂട്ട് ഉണ്ടാക്കി
അടുക്കളപ്പുറങ്ങളില് വിളമ്പുന്നു
ദുഷിപ്പ് നാറുന്ന ചുണ്ടുകള്.
അത്താഴ മേശയില്
മൃഷ്ടാന്നഭോജനത്തിന്റെ ഏമ്പക്കം ..
മാനം നഷ്ടപ്പെട്ട പെണ്ണിന്റെ
ജീവിതം വെച്ച് അറുമാദിക്കുന്ന
കാമക്കോമരങ്ങള്
ഓര്ക്കാതെ പോകുന്നു.
സ്വഗൃഹത്തിലെ
നാളെയുടെ വാഗ്ദാനങ്ങളെ...
കിട്ടാത്ത മുന്തിരി പുളിക്കുമെന്ന
പഴമൊഴിയെ ഓര്മപ്പെടുത്തി
ഓരിയുടുന്നു കുറുക്കജന്മങ്ങള്..
വഞ്ചനയും ചതിയും
പൌഡറും സെന്റുമായി
പൂശി നടക്കുന്നവര്,
ചീഞ്ഞളിഞ്ഞ മനസ്സിനെ
വര്ണ്ണ കുപ്പായങ്ങളില്
ഒളിപ്പിച്ചു വെക്കുന്നു.
മധുരമൊഴികളും
കൌശലമിഴികളുമായി
എവിടെയും കാണാം..
സദാചാരമെന്നവാക്കിനെ
ദുഷിപ്പിക്കുന്ന കപടമുഖങ്ങള്..
No comments:
Post a Comment