വീട്ടിലേക്കുള്ള വഴി
********************
ഒരു നാൾ എനിയ്ക്കുമുണ്ടായിരുന്നു;
കലപിലകൂടും കുരുവികളും
കളകളം പാടുന്നൊരരുവിയും പാടവും
താളം പിടിച്ചൊരു കുഞ്ഞുനാട്!
ആ നാട്ടുവഴികളിന്നെങ്ങുപോയി?
കരിയിലപ്പക്ഷികൾ തുള്ളിക്കളിക്കുന്ന
നന്മകൾ പൂക്കുന്ന കാവും തുളസിയും
കുളിരണിയിച്ചൊരാസ്നേഹവീട്?....
കാണുന്നില്ലാ വീട്ടുവഴികളൊന്നും
കാടുപിടിച്ച മനസ്സുമാത്രം!
കാട്ടുപൂവിന്റെ മണവുമില്ല
സ്വാർത്ഥങ്ങൾതൻ നിഴലാട്ടമെങ്ങും!
ഗതകാലജീവിതം വെച്ചുനീട്ടും
സ്വപ്നങ്ങൾ ചുറ്റിലുമാടിടുമ്പോൾ
പഴിചൊല്ലിപ്പിരിയാതെ മാടിവിളിക്കുന്നു
നിശ്ശബ്ദമെന്നെയീനാട്ടുപാത!
No comments:
Post a Comment