തിരുവാതിര
**********
ആതിരരാവായി തോഴിമാരേ,
കൈകൊട്ടിയാടിക്കളിച്ചിടേണ്ടേ!
കൈലാസേശന്റെ തിരുനാളല്ലോ,
മംഗളം വായ്ക്കും തിരുനോമ്പല്ലോ!
പൊന്നൂഞ്ഞാലാടിക്കളിച്ചിടേണ്ടേ,
പാടിത്തുടിച്ചു കുളിച്ചിടേണ്ടേ!
മംഗല്യസ്ത്രീകൾ നമുക്കീ പ്രണയാർദ്ര-
രാവിതിലുത്സവ കേളിയാടാം.
പാതിരാപ്പൂചൂടി, നീൾമിഴിയി-
ലാർദ്രസ്വപ്നങ്ങളും കണ്ടിരിക്കാം.
ദീർഘസുമംഗലീഭാഗ്യത്തിനായ്
പൂത്തിരുവാതിരയാഘോഷിക്കാം!
പഞ്ചാക്ഷരീമന്ത്രം ചൊല്ലിക്കൊണ്ടേ
മാനസം തീർത്ഥക്കുളമതാക്കാം.
സങ്കടനാശന, ശ്രീശിവശങ്കര
ഞങ്ങൾക്കനുഗ്രഹം നല്കിടേണേ!
No comments:
Post a Comment