കാറ്റുവന്നുമുട്ടിയെന്റെ കിളിവാതിലിൽ കേട്ടുവന്ന പൂങ്കുയിലോ പാടിയൊരീണം നാട്ടുമാവിൻ ചോട്ടിലെന്റെ ഓർമ്മകളായി പൂത്തു നിൽപ്പൂ ഇന്നുമെന്നും കാവ്യചാരുത
നോട്ടമേറെയേറ്റുവാങ്ങും പൂക്കളിലെല്ലാം കൂട്ടമോടെ പാറിയെത്തും ചിത്രപതംഗവും നേർത്ത മഴചാറ്റലിൽ നിറയും മോഹമോ കോർത്തിണക്കി ഹൃത്തിലൊരു ഹാരമായി
ഹർഷവർഷമായി ഭൂവിൽ മുത്തമിട്ടിടും നയനമോഹന കാഴ്ചയായി, നടനമാടി ഹൃത്തിലാമോദ കുളിരുമായ് വന്നെൻ ബാല്യകാലസുഗന്ധമേറി മുട്ടി വിളിച്ചതോ..
ഹൃദയമർമ്മരങ്ങൾ.
------
നിറയുന്ന മിഴികളെ കോരിക്കുടിക്കുവാൻ
എങ്ങുനിന്നെത്തി കിനാപക്ഷി നീ
കൊഴിയാതെ നിൽക്കുമാ മോഹച്ചില്ലയിൽ ഒരു കൂടെനിക്കായൊരുക്കീടുമോ..നീ..
മറവിയാഴത്തിൽ കുഴിച്ചു മൂടിയാലും
മുളച്ചു പൊന്തുന്നു കുതിക്കുമോർമ്മകൾ
തളരാതെ മുന്നേറാൻ താങ്ങും തടിയായി
നല്ല പ്രവർത്തികൾ തൻ ആത്മബലം..
ഒളിച്ചുകളിക്കുന്ന ഓർമ്മയും മറവിയും
തനിച്ചിരിക്കുമ്പോൾ നിശ്ശബ്ദമാകുന്നു
കലപില കൂട്ടുന്ന വാഗ്വാദങ്ങൾക്കിടയിലും
മഴവിൽവർണ്ണങ്ങളാൽ സ്വപ്നം നെയ്യുന്നു.
എന്തിനു വേപുഥപൂണ്ടു നാമോടുന്നു
ഖിന്നതയാലീ ജന്മം തുലയ്ക്കുന്നു
ആകാശത്തോളം സ്വപ്നങ്ങൾ പൂക്കുമീ
ജീവിതയാത്രയിന്നെത്രയോ സുന്ദരം..
പൊന്നിൽ കുളിച്ചൊരു ചിങ്ങം വന്നിട്ടും
കാർമേഘക്കൂട്ടിലോ മലയാളിമനസ്സ്
ജോലിയും കൂലിയുമില്ലാതെയെങ്ങനെ
പോന്നോണം നല്ലോണമായി മാറും..
പൂവിളിക്കൊപ്പം പൂക്കൂട നിറയാൻ
പലവർണ്ണ പൂക്കൾ തൊടിയിലുണ്ടേ..
കുഞ്ഞിളം തെന്നലിനൊത്തു ചാഞ്ചാടി
തുമ്പയും മുക്കുറ്റിയും കൂടെയുണ്ടേ..
ആരോടും പരിഭവമില്ലാതെ നിന്നൊരാ
ചെമ്പരത്തിയുമെത്തി പൂക്കളത്തിൽ ഉത്സവലഹരിയാൽ പത്തുദിനങ്ങളിൽ
ഒരുമയോടങ്ങൊത്തുകൂടിയെല്ലാവരും..
ഓടിക്കളിക്കുന്ന ചെമ്പഴുക്കയും പിന്നെ,
ആടി തിമിർക്കുന്ന തുമ്പിതുള്ളൽ
നഷ്ടസ്വപ്നങ്ങളെ താലോലിച്ചങ്ങനെ
ഊഞ്ഞാല് കെട്ടിയെന്നോർമ്മകളാൽ.
കഷ്ടനഷ്ടങ്ങളേറെയാണെങ്കിലും,
തൂശിനില സദ്യയൊരുക്കിയില്ലെങ്കിലും
പൈതൃകമോതുമൊരു നല്ലകാലത്തിന്റെ
ഓർമ്മയായ്,
നേരുന്നു,
ഓണദിനത്തിലാശംസകളേവർക്കും...
തളർന്നെന്നറിയുമ്പോൾ
തകർക്കാൻ പാഞ്ഞടുക്കുന്നവർ
തിരിഞ്ഞൊന്നുനിന്നാൽ ചൂളുന്ന
ഭീരുക്കൾ!
പൊരുതി ജയിക്കാനുറച്ചിറങ്ങീടുമ്പോൾ
വാക്ശരങ്ങൾ തൊടുക്കുമധീരർ
മറഞ്ഞിരുന്നു പോർവിളി കൂട്ടുമ്പോൾ
തളരാതെ മുന്നേറാനാത്മധൈര്യം.
അവനവനിൽ വിശ്വാസമില്ലാത്തവർ
അന്യന്റെ ജീവിതത്തിൽ നുഴഞ്ഞുകേറി
അങ്ങോട്ടുമിങ്ങോട്ടും തമ്മിലടിപ്പിച്ചു
ആത്മരതിയിൽ സംതൃപ്തിയടയുന്നു.
ദൃഢചിന്തകളുള്ളിൽ നിറയുമ്പോ -
ളാത്മവിശ്വാസം താനേ വന്നീടും..
ശരിയെന്നു തോന്നുന്ന പാതയിൽക്കൂടി
തോൽക്കാത്ത മനസ്സുമായി ജീവിച്ചീടാം
കല്ലും മുള്ളും നിറഞ്ഞ പാതയെങ്കിലും,
സന്തോഷത്തിന്റെ പൂക്കൾ വിതറി
സ്നേഹത്തിന്റെ പരവതാനി വിരിച്ചു
ദുഃഖത്തിന്റെ കരിമ്പടം വലിച്ചെറിയാം..
~
അത്തം വന്നു മുത്തം തന്നു
ഓണത്തപ്പനെ വരവേല്ക്കാനായ്
നാടും വീടുമുണർന്നു തുടങ്ങി.
കോടികൾ വാങ്ങാം സദ്യയൊരുക്കാം
കൊറോണയൊന്നു പോയ് മറയട്ടേ..
തമ്മിൽ അകലം പാലിച്ചോണ്ട്
തൊടിയിലെ പൂക്കളിറുത്തീടാം
ഓണത്തപ്പനിങ്ങെത്തൂലോ
ഉള്ളതു കൊണ്ടൊരു സദ്യയൊരുക്കാം!
തമ്മിൽ സ്നേഹം പങ്കുവെച്ചീടാം;
എല്ലാവർക്കും നല്കീടാം...
ആർഭാടങ്ങൾ കുറച്ചീടാം
ഇത്തിരി ക്ഷമയതു കിട്ടീടാം
അകലം പാലിച്ചായീടാം.
മഹാമാരികളകന്നൊരു കാലം
ആഹ്ലാദങ്ങൾ നിറയും കാലം
വന്നിടുമിനിയും ആഘോഷങ്ങൾ!
ഭീതിയകന്നൊരു ഉത്സവകാലം
അന്നൊരുമിക്കാം, കൂട്ടം കൂടാം
സ്നേഹം തമ്മിൽ കൈമാറാം!
~
കാത്തിരിക്കുകയാണിന്നുമാ
മിഴികളാരെയോ ?
കാലം പിന്നോട്ടോടീടവേ..
കേൾക്കാൻ കൊതിക്കയാണാ
സ്വരം പിന്നെയും
പാതിയിൽ നിന്നതിൻ ബാക്കിയായി..
കിനാവിലിന്നിത്തിരി
നേരമെന്നരികിലിരുന്നു തൊട്ടുതലോടിയതാരോ!
പൂർണ്ണത തേടുന്ന
സ്വരരാഗ വാടിയിൽ
വാക്കുകളായിരം പൂക്കളായി... !
ഋതുമാറി വന്നപോൽ
പൂക്കും വസന്തമായ്
നിനവിൽ നിലാമഴ പെയ്തനേരം
കൊഴിഞ്ഞൊരാ കാലത്തിൻ
മോഹവും സ്വപ്നവും ബാക്കിയായി!
തളിരിട്ട മോഹങ്ങൾ,
നിറമുള്ള സ്വപ്നങ്ങൾ,
കുഞ്ഞിളം കാറ്റിൻതലോടൽ പോൽ
പടിവാതിലിൽ വന്നു
പാടിയ പൂങ്കുയിൽ.....
പാതിരാസ്വപ്നമായ് മാഞ്ഞുവല്ലോ!
~
