ഓര്‍മ്മകളുടെ തെളിനീര്‍

പുലര്‍കാലത്തെ വരവേല്‍ക്കുന്ന

കുഞ്ഞിക്കിളികളുടെ കളകളാരവം,

മന്ദമാരുതന്റെ തലോടലില്‍

പുളകം കൊള്ളുന്ന ആലിലകള്‍,

ആദിത്യകിരണമേറ്റപ്പോള്‍

ലജ്ജാവതിയായി സൂര്യകാന്തി.

മണല്‍തരികളെപ്പോലും

സുഗന്ധ പൂരിതമാക്കുന്ന,

മുല്ലപ്പൂക്കളുടെ മനം-

മയക്കുന്ന സൌരഭ്യം..

കനലെരിയുന്ന മനസ്സിനെ

ഓര്‍മ്മകളുടെ തെളിനീരില്‍

ശുദ്ധികലശം നടത്തിയപ്പോള്‍,

പുതുമഴയില്‍ നനയുന്ന സുഖം....

ഏതോ മരക്കൊമ്പില്‍ നിന്നുയരുന്ന

കുയില്‍നാദത്തിന്റെ മാസ്മരികതയില്‍

തുടികൊട്ടിയുണരുന്ന സ്നേഹം...

സങ്കല്പ പൂങ്കാവനത്തില്‍ വിരിഞ്ഞ

പനിനീര്‍പ്പൂവിന്റെ ഇതളുകളിലെ

മഞ്ഞുകണം പോലെ പുഞ്ചിരി

തൂകി നില്‍ക്കുന്നു എന്‍ പ്രേയസി...