ആരാണ് നീ ,
എനിക്കറിയില്ലയെങ്കിലും
നിഴലായ് എന് പിന്നിലെന്തേ
നടക്കുന്നു.
ഇതുവരെ കണ്ടില്ല ,
നിന് മുഖമൊരുമാത്ര
വിടര്ന്ന മിഴിയോ,
ചിരിക്കുന്ന ചുണ്ടോ..
എങ്കിലും എന്നെ
വലം വെച്ചു നില്ക്കുന്നു
നിന് നെടുവീര്പ്പിന്
ചുടു നിശ്വാസങ്ങള്.
എത്രമേലകന്നിട്ടും
പോയിടാതെന്നരികില്
നില്ക്കുവാനെന്തു
ബന്ധം നിനക്കെന്നോട്.
എന് മിഴിപ്പൂക്കള്
തുടയ്ക്കുവാനെത്തുന്ന
അദൃശ്യമാം കരങ്ങളിലെ
തണുപ്പറിയുന്നു ഞാന്.
ചിരപരിചിതനെപ്പോലെ
എന്നോട് ചേര്ന്ന് നടക്കുന്ന
മൌന നൊമ്പരമോ നീ...
തിരിഞ്ഞൊന്നു
നോക്കുമ്പോള്
മറയുന്നതെങ്ങു നീ
വ്യഥയായ് ഭീതിയായ്
എന്നിലലിയുന്നുവോ?
ആരാണ് നീ
എനിക്കറിയില്ലയെങ്കിലും
എന്നിലെ നിഴലായ്
നടക്കുന്നു ഇന്നും നീ.
No comments:
Post a Comment