പൂനിലാവേറ്റു വിരിഞ്ഞ സ്വപ്നങ്ങൾക്കു
പ്രണയത്തിൻ നിറമല്ല, മോഹമല്ല.
തെരുവിന്റെ മക്കളൊത്തത്രയും മധുരമായ്
വർണ്ണശലഭങ്ങളായ് ചിറകുവീശി.
ആകാശച്ചോട്ടിലെ ചെടികളെല്ലാം പുഷ്പിണിയായ് കുട ചൂടിനില്പൂ!
പട്ടുനൂലിഴപോൽ മഴത്തുള്ളികൾ
മുത്തുപോലെങ്ങും കുളിരുപെയ്തു.
പഞ്ഞമില്ലൊട്ടും, പരാതിയില്ല
സ്നേഹം ചമച്ചൊരു വർണ്ണലോകം!
നിർമ്മലസ്നേഹനിമിഷങ്ങളൊക്കെയും
മാരിവില്ലഴകായ് വിരിഞ്ഞ ലോകം!
കിളികൾതൻ കളകളം കേട്ടനേരം
ഇമകൾ തുറക്കവേ പുലരിവെട്ടം!
എന്തൊരു രസമായിരുന്നുവെന്നോ
നന്മകൾ പൂക്കുമാസ്വപ്നലോകം!
No comments:
Post a Comment