ദുരിതങ്ങളെത്രയോ താണ്ടിയെന്നും
ഭാരതമണ്ണിനെ കാത്തിടാനായ്
എങ്ങും വെളിച്ചമായ്ത്തീർന്ന ഗാന്ധി
നാട്ടിന്റെ ശക്തിയായ് പ്രോജ്ജ്വലിപ്പൂ.
ഈ ജന്മഭൂമിതൻ നന്മയ്ക്കായി
ജീവിതസർവ്വം ത്യജിച്ച ഗാന്ധി
നീങ്ങിയ പാതയിലെന്റെ പാദ-
യുഗ്മം ചരിയക്കാനിടവരുമോ?
കേട്ടറിഞ്ഞുള്ളതിന്നപ്പുറത്തായ്,
വിശ്വാസധാരയ്ക്കുമപ്പുറത്തായ്
സ്നേഹം ക്ഷമയും സഹനവുമായ്
ജീവിതം ധന്യമായ്ത്തീർത്ത പുണ്യം!
സത്യമഹിംസകൾ ലാളിത്യവും
നിത്യചൈതന്യമായ് കാട്ടി, സ്വന്തം
ജീവിതം സന്ദേശമെന്ന ചൊല്ലി
നിത്യനായ്ത്തീർന്ന ചൈതന്യരൂപം!
ആ ധന്യപാതയിലൂടെയെന്നു-
മേറാൻ കഴിഞ്ഞെങ്കിലെന്റെ പുണ്യം!
No comments:
Post a Comment