പൊലിഞ്ഞു പോയ മാലാഖ
*****************************
അശരണാർക്കാശ്രയമാകുവാനായ്
ആതുരസേവനം ചെയ്തിടുമ്പോൾ ,
അവനിയിൽ നിന്നും തുടച്ചു നീക്കാ-
നവൾ ചെയ്ത തെറ്റെന്തറിഞ്ഞുകൂടാ.
കാണാതെ പോകയോ നിയമവും, ലഹരികൾ-
ക്കടിമയായ് ചെയ്യുന്ന ക്രൂരകൃത്യം!
എന്തു ചെയ്യണം ലഹരിയ്ക്കടിപ്പെട്ട
ജനതയ്ക്കു മോചനം നൽകിടാനായ്?
അനുശോചനത്തിന്റെ പേരിൽ നാം കൂടിടാം,
വാർത്തകൾ പിന്നെയും വന്നുചേരാം!
ഒക്കെയും വിസ്മൃതിയിലാണ്ടുപോകാം, ദു:ഖ-
മപ്പൊഴുമുറ്റവർക്കൊന്നുമാത്രം!
ഇനിയുമുണ്ടാവാതിരിക്കണം പാതകം,
പ്രതികരിച്ചീടണം നമ്മളെല്ലാം.
ലഹരിവിമുക്തമാം നാടിനായ് നാം മറ-
ന്നീടണം രാഷ്ട്രീയമെന്നുമെന്നും.
ഒന്നായ് തുടച്ചുനീക്കീടണം, ലഹരിയായ്
തീർന്നൊരീ നാടിന്റെ ശാപമെങ്ങും.
കാണാതിരിക്കട്ടെയിനിയൊരു ദുരന്തവും
മകളേ, നിനക്കാത്മശാന്തി നേരുന്നു.
No comments:
Post a Comment