കൃഷ്ണാഷ്ടമി

 കൃഷ്ണാഷ്‍ടമി

***************

അഷ്ടമിരോഹിണിനാളിൽ പിറന്നു നീ

അമ്മമാർക്കെല്ലാർക്കും പൊന്നുണ്ണിയായ്.

വെണ്ണകവർന്നുണ്ണുമമ്പാടിക്കണ്ണാ, നിൻ

ജന്മനാളിന്നണഞ്ഞുവല്ലോ!

കുസൃതിച്ചിരിയാലോളങ്ങൾതീർത്തു നീ

അഴലുകളൊക്കെയുമലിയിച്ചുവോ?

സ്നേഹസ്വരൂപനായെന്നുള്ളിൽ നടമാടി

പ്രണയത്തിൻ മുരളികയൂതിയൂതി!

മോഹനഭാവത്തിലുള്ളിൽ വിരിയുന്ന

സുസ്മിതത്തിന്നെന്നുമെന്തുഭംഗി !

മോദമോടെന്നുമെന്നുള്ളിൽ തെളിയുന്ന

നിൻ രൂപം കാണുകിലതെത്ര പുണ്യം!

ജീവിതസാഗരച്ചുഴിയിൽപ്പെടുന്നേരം

തേജോമയം മുഖം ധ്യാനിക്കുമ്പോൾ

ഉള്ളിലഴലിന്നലകളടങ്ങി, നിൻ

കള്ളച്ചിരിയെന്റെയുള്ളിലൂറും!