കാത്തിരിപ്പ്
*************
ശാന്തമാണാഴിയെന്നാകിലുമാകാശ-
മിത്രമേലെന്തേ പിണങ്ങിനില്പൂ!
ഒട്ടിയവയറിനായന്നവും തേടി ഞാ-
നാഴക്കടലിലിറങ്ങിയേക്കാം.
ആഴിയിൽ വിളയുമാമുത്തും പവിഴവും
തപ്പിയെടുക്കുവാനെത്തിടുമ്പോൾ
കോപിച്ചിടൊല്ലേ.. കടലമ്മേ ഞങ്ങളെ
കരുതലോടെപ്പൊഴും കാത്തുകൊൾക!
ജീവിതക്കടലിന്റെ മദ്ധ്യത്തിലിന്നു ഞാ-
നേകയായ് നങ്കൂരമിട്ടിടുമ്പോൾ
കരിപൂണ്ട വാനമായെൻശോകമൊക്കെയും
കാലത്തിനൊപ്പമൊഴുകയല്ലോ!
അഴലുകളായിരം വന്നണഞ്ഞാലും,
അണയാതെ ജീവിതം കാത്തിടാനായ്,
കണ്ണിൽ തിരിവെച്ചു കാത്തിരിപ്പൂ സ്നേഹ-
ദീപമായ് കൂരയിലിന്നൊരുവൾ!
No comments:
Post a Comment