മിഴിപ്പെയ്ത്ത്
*************
നിഴല്‍പോലെയെത്തുന്ന
ദുഃഖങ്ങളൊക്കെയും
ഒരു മഴപ്പെയ്ത്തില്‍
ഒലിച്ചുപോയീടുമോ ?
ചിരിതൂകിയരികില്‍
നില്‍ക്കുന്ന മോഹങ്ങള്‍
ഒരു പുതുമഴയില്‍
തളിരിടുമോ ?
ദുരമൂത്ത ബധിരർ
നിറഞ്ഞയീലോകത്ത്
കണ്ണുനീർ പ്രളയമായി, മാറീടുമ്പോള്‍
കാരുണ്യമെന്നൊരു
വാക്കുപോലുമിന്ന്
കാറ്റിന്റെ കയ്യിലെ കളിപ്പാട്ടമോ..?
കോമരംപോലെ
തുള്ളുന്ന ചിന്തകള്‍
വാളെടുക്കുന്നു|;
കലികാല തന്ത്രങ്ങള്‍
പോരിനിറങ്ങുന്നു;
ഒന്നുമേയറിയാതെ
രക്തസാക്ഷിയാവാന്‍ മാത്രം
ചിലജന്മങ്ങള്‍.
ഒച്ചിനെപ്പോലെ
ഇഴയുന്നജീവിതം
വക്കുപൊട്ടിയ
വാക്കിനാല്‍ മുറിയുമ്പോള്‍
പെറ്റുവീണതാം
മണ്ണിനെ മറന്നവര്‍
കണ്ണീര്‍പ്പുഴയിൽ
കടലാഴങ്ങള്‍തേടുന്നു !
നിഴല്‍പോലെയെത്തുന്ന
ദുഃഖങ്ങളൊക്കെയും
ഒരു മഴപ്പെയ്ത്തില്‍
ഒലിച്ചുപോയീടുമോ ?
ചിരിതൂകിയരികില്‍
നില്‍ക്കുന്ന മോഹങ്ങള്‍
ഒരു പുതുമഴയില്‍
തളിരിടുമോ ?
No comments:
Post a Comment