പിറവി

ഇനിയുമുണ്ടൊരുജന്മമെങ്കിലീഭൂവിലൊരു

മലരായ് ജനിക്കണമെനിക്കതാണാഗ്രഹം!

എങ്ങും സുഗന്ധം പരത്തണം, പിന്നെയൊരു

മരമായ് വളർന്നേറെ പന്തലിച്ചുയരണം!

കിളികൾക്കൊരഭയമായ്, മണ്ണിതിൽ തണലായി-

മാറണം, മനസ്സിലൊരു കുളിരായി നിറയണം.

തെളിനീർപ്രവാഹമായ്ത്തീരണം, വരളുന്ന

മണ്ണിന്റെ നിറവിനായ്, കുളിരിനായെപ്പൊഴും!

വീണ്ടുമൊരു മഴയായ് തിമർത്തുപെയ്തീടണം,

മണ്ണിതിൽ പുഴയായ് പിറക്കണം, നാടിന്റെ-

ദുരിതങ്ങളെല്ലാമൊഴുക്കണം, നന്മത

ന്നലകളായ്, നിറവിനായ് നാടെങ്ങുമൊഴുകണം!

വീണ്ടുമൊരു ജന്മമുണ്ടെങ്കിൽ മനുഷ്യനായ്

മണ്ണിതിൽത്തന്നെ പിറക്കണം, ഏഴകൾ-

ക്കഭയമായ്, കണ്ണുനീരൊപ്പാൻ ജനിക്കണം,

മണ്ണിന്നൊരോമനയായ്ത്തീരണം!